Ljótt að heyra

Ég á nú sjálfur tvö börn sem hafa lokið framhaldsskóla, tvö sem eru sem stendur í framhaldsskóla og eitt sem er á leið þangað.

Ég minnist þess að þegar eldri börnin mín voru á þessari leið þá var mér tjáð, eitthvert sinn þegar ég vildi fá upplýsingar um mætingu, að mér kæmi þetta einfaldlega ekki við þegar þau væru komin yfir 16 ára aldurinn. Sem þá var sjálfræðisaldur.

Síðar var sjálfræðisaldurinn hækkaður í 18 ár og þá fékk maður að fylgjast vel með fram að þeim aldri. Þ.e.a.s. frá skólans hendi.

Ég tek fram að það hefur aldrei verið nein togstreita milli okkar hjóna og okkar barna um að fá að fylgjast með námi þeirra og í þetta sinn sem mér var neitað um upplýsingar var ég að hringja að beiðni sonar míns.

Mér þykir sjálfsagt að foreldrar fylgist með námi barna sinna. Ég skil hins vegar engan veginn af hverju miða á upplýsingaflæði við áfengiskaupaaldur. Ef miða á við aldur þá finnst mér eðlilegast að miða við sjálfræðisaldurinn.

Eftir að ungmennin eru komin yfir 18 ára aldur þá finnst mér hins vegar að athuga skuli hver það er sem ber kostnaðinn af skólagöngu þeirra. Ef foreldrar greiða skólagjöldin og ef þau búa enn í foreldrahúsum, á kostnað foreldranna, þykir mér mjög eðlilegt að foreldrarnir fái að fylgjast með framgangi þeirra í námi.

Þetta ætti ekki að vera mikið vandamál og ætti aldrei að vera vandamál skólans. Við skulum gera ráð fyrir því að hjá flestum fjölskyldum séu foreldrar vel upplýstir um námferil sinna barna.

Það sem mér þykir sérkennilegast við þessa frétt er hversu viðkvæmt mál þetta virðist vera fyrir þessa 37 nemendur sem um ræðir og leitt að heyra að þeir skuli ekki sinna námi sínu betur. 

Mátti ekki veita foreldrum upplýsingar um mætingu

Athugasemdir

[Eygló, 2.3.2009 kl. 15:25]

Nú var ég heppin að byrja ekki að æsa mig við þig áður en ég kláraði að lesa alveg niður greinina.

Ætlaði að ausa mig yfir þig :)....

en svo kom það; allt sem ég hefði viljað sagt hafa.

"krakkar" sem vilja hafa allt útaf fyrir sig, verða bara að borga allan skólakostnað sjálfir, borga húsnæði, þjónustu og fæði sjálf.

Taki foreldrar ábyrgð á þessu öllu er fjandann það minnsta að foreldrarnir geti fylgst með því að þeirra framlag nýtist afkvæminu (mæting, frammistaða)

Fjúkk, var svo 100% sammála þér eftir allt.

[Emil Örn Kristjánsson, 2.3.2009 kl. 16:02]

Já, Eygló mín, það er betra að lesa alla leið. Ekki satt?

Gott að vita að einhverjir eru sammála mér í þessu. Mér finnst þetta einfaldlega vera svo sjálfsagt.

[Eygló, 2.3.2009 kl. 23:52]

Er verið að reyna að fela eitthvað?

Hvernig er eiginlega samband foreldra og ungmenna?

Vonandi að þau fái rassskellingu í einhverri mynd áður en þau endanlega eyðileggjast af ofdekran.