Góð frétt

Mér má vera slétt sama þó Mr. Big haldi fram hjá Carrie eða hvort Amy Wienhouse er edrú degi lengur eða skemur... en þetta þykir mér frétt. Mér þykir þetta ánægjuleg og hlý stórfrétt og ég gleðst fyrir hönd þessara gömlu félaga.

Blessaðir karlarnir.

Paul og Ringo sungu saman

Hann Silvio

Það er sama hvað manni má finnast um Silvio Berlusconi þá verður því seint neitað að hann er einstakur í sinni röð.

Mér datt í hug vísa eftir snillinginn Piet Hein:

Hvad rager det den/som er sikker på sit/at resten af verden/ er ude af trit.

Berlusconi var í símanum

Hver mælti svo?

Þið megið gizka á hver mælti þessi orð:" ....rétt [er] að minna á að stjórnarandstöðunni hefur í tvígang tekist einmitt með langri umræðu að koma í veg fyrir vanhugsuð og stórskaðleg stjórnarfrumvörp..."

Þetta var sagt 21. janúar 2007. Og hverjum mæltist svo?

Engum öðrum en Ögmundi Jónassyni. Þá þótti honum í lagi að tefja frumvörp með umræðum og enginn sagði honum að halda kjafti.

Framkoma Katrínar Júlísdóttur dæmir sig sjálf.  Hún kemur upp um hugsunarhátt þeirra samfylkingarmanna (karla og kvenna). Þvílíkur hroki, dómhvöt og valdasýki er fáheyrð.

Skemmtilegir tónleikar á morgun

Þó ekki væri annað þá er eitt sem ég hef ákveðið að gera núna um helgina.

Ég ætla að fara á tónleika hjá Skólahljómsveit Grafarvogs á laugardaginn. Þeir verða haldnir í Grafarvogskirkju og hefjast klukkan 15:00

Ég hlakka mikið til að hlusta á ungt tónlistarfólk í hverfinu mínu flytja metnaðarfulla dagskrá, sem þau hafa verið að æfa síðastliðinn vetur.

Ég hvet alla sem áhuga hafa að skella sér líka á tónleikana. Bæði til að hlusta á góða og fjölbreytta tónlist og einnig til að hvetja ungt tónlistarfólk til frekari verka.

Glæsilegt

Þetta er gott mál. Umferðamiðstöðin var mikið framtak á sínum tíma en við þurfum stærri og notadrýgri samgöngumiðstöð. Nú fáum við glæsilega miðstöð sem sinnir bæði land- og loftsamgöngum.

Það er löngu tímabært að Reykjavíkurflugvöllur fái sómasamlega flughöfn og nú verður hægt að flytja aðstöðuna úr skúrunum við vestan flugvallarins. Þá mun flughöfnin færast nær miðbænum og samgöngumiðstöðin nýja mun genga svipuðu hlutverki og aðaljárnbrautarstöðvar gegna víða í höfuðborgum.

Það er nú einu sinni þannig að ætli Reykjavík sér að standa undir nafni sem höfðuborg Íslands verður hún um leið að vera samgöngumiðstöð fyrir landið allt. Með þessu mun hún geta gengt því hlutverki með meiri sóma en fyrr.

Ekki spillir svo fyrir að þessi framkvæmd mun einnig skapa atvinnu og ekki veitir af. Eins og ég hef oft sagt áður: Það er betra að borga fólki eitthvað meira fyrir að skapa verðmæti en atvinnuleysisbætur fyrir að líða illa. Einmitt þess vegna á hið opinbera, ríki og sveitarfélög, að fara núna í framkvæmdir sem aldrei fyrr.

 

Vill byrja á samgöngumiðstöð á þessu ári

Stjórnarskráin krefst vandvirkni

Ég vísa í vefrit mitt frá því fyrr í dag um þetta mál.

Vilja vísa stjórnarskrármáli frá

Stjórnarskrárbreytingar krefjast tíma og vandvirkni

Stjórnarskráin eru þau lög sem öll önnur lög byggja á. Stjórnarskráin er sá öryggisloki sem kemur í veg fyrir að hægt sé með lagasetningu að ráðast gegn þeim grundvallarmannréttindum og lögmálum sem samfélagið byggir á.

Þess vegna á að vera erfitt og tímafrekt að breyta stjórnarskránni. Sama hvað manni kann að finnast breytingarnar tímabærar, góðar og réttmætar. Það má ekki flana að neinu þegar jafn mikilvægt mál og stjórnarskráin sjálf er til umfjöllunar. Ef stjórnarskrábreytingar væru einfaldar og fljótgerðar er hætt við að ýmislegt gæti gerst í hita augnabliksins.

Þess vegna má ekki kasta til höndunum með umrætt stjórnarskrárfrumvarp... eða breytingum á stjórnarskránni yfirleitt

Persónulega finnst mér að stjórnarskrárbreytingar ættu bæði að þurfa aukinn meirihluta á Alþingi og vera síðan skotið til þjóðarinnar til að fá aukinn meirihluta í þjóðaratkvæðagreiðslu. Mér finnst að þjóðin verði að fá að segja sitt álit beint þegar slíkar grundvallarbreytingar eiga sér stað og að það verði að vera í þökk verulegs meiri hluta þjóðarinnar.

Nú veit ég að atriði í stjórnarskrá Íslands, sem ég vildi sjá breytt, myndu líklega ekki hjóta náð fyrir aukum aukins meirihluta í þjóðaratkvæðagreiðslu. Það breytir því ekki að þannig meðferð myndi ég kjósa að sjá þegar breyta þarf stjórnarskránn.

Skylda að koma í veg fyrir vanhugsaðar breytingar

Eru þetta ekki ofurlaun?

Það er munur að vera hverrar krónu virði... sérstaklega eins og krónan er metin þessa dagana, eða þannig.

Annars er einkennilegt að sjá hvernig ýmsir vefritarar vaða fram á völlinn og lýsa því yfir að þetta séu sko engin ofurlaun og bera saman við bankastjóralaun til skamms tíma. Það vill til að þar er ólíku saman að jafna.

Eva Joly mun ætla sér að vinna hér 4 daga í mánuði og fyrir það fær hún 1.3 millur. S.s. 325þúsund á dag eða 7.150.000 krónur í mánaðarlaun miðað við fulla vinnu!

Jæja, þetta er kannske ekki sanngjarnt. Gefum okkur að hún vinni eitthvað úr gögnum heima hjá sér. Gefum okkur að hún leggi jafnvel álíka vinnu í þessi mál utan Íslands eins og hún gerir hér. Þá er hún ekki með nema rúmlega 3 og 1/2 millu á mánuði... Halló! Ef það eru ekki ofurlaun þá veit ég ekki hvað.

Og svo að lokum: Hvað er þetta með hann Steingrím J. og Norðmenn? Með fullri virðingu fyrir Evu, hún er enn einn Nojarinn í starfsliði þessarar ríkisstjórnar.  Er þetta eitthvert "plott"?

En þar sem hún er nú útlendingur þá má svo sem ætla að hún fái meiri frið og sé sýnd meiri virðing en okkar eigin saksóknurum. Væri það ekki munur ef við ættum úr svo miklu fé að spila til að leggja Efnhagasbrotadeild Rannsóknarlögreglunnar?

Ég get ekki að því gert. Mér finnst þetta lélegt. 

Dapurlegar fréttir af Samson

Sagnfræði er vísindi

Fyrirsögn þessarar féttar er svolítið óheppileg. En ég verð að taka undir með Guðna að því leyti að hér er slegið fram fullyrðingum algerlega á skjön við almenna söguþekkingu.

Svona "afhjúpun" verður að vera vönduð og standast heimildarýni og henni verður að fylgja vönduð og aðgengilega heimildaskrá.

En ég er líka sammála Guðna að það er ekki bara sagnfræðinga að skoða og skirfa um fortíðina. Það verður samt að gera sömu kröfu til allra um vönduð og vísindaleg vinnubrögð. Í slíku tilfelli sem þessu hlýtur krafan að vera jafnvel enn strangari.

Trúir engu í Lesbókargrein um ævintýralegan flótta

Fögnum þessu

Mér þykir það bezta mál hér þrífist fleiri bankar. Það er gott að hér starfi banki sem ekki er upp á hið opinbera kominn og stýrt af póltísku bankaráði. Ekki verra ef það verður til veita einhverjum þeirra vinnu, sem misstu hana á dögunum þegar SPRON var lokað.

Þetta  verður til að gera allt bankaumhverfi á landinu heilbrigðara. Væri ekki ekki stjórn Íslandsbanka, eða hvað hann nú kýs að kalla sig í dag, hollara að fagna heiðarlegri samkeppni. Þessi kaup og þessi stækkum MP-banka hlýtur að vera þjóðhagslega hagkvæm og þ.a.l. koma öllum til góða.

Vonandi fáum við svo fjársterka aðila með nýtt fé til að kaupa sig inn í ríkisbankana og byggja upp heilbrigt viðskiptaumhverfi. Og þegar ég segi heilbrigt þá verður að fylgja með að þar falli einnig undir heilbrigt og réttlátt aðhald og eftirlit.

Lögðust gegn sölu SPRON