Sléttuband

 Datt í hug að deila með ykkur sléttubandi. Slíkar vísur eru þannig gerðar að þær má lesa jafnt afturábak sem áfram:

 

Sléttuböndin kveða kenn

krafta-skáldið góða.

Fléttu getur ofið enn

undrabarnið fróða.

 

Fróða barnið undra enn

ofið getur fléttu.

Góða skáldið krafta kenn

kveða böndin sléttu.

Athugasemdir

[Hjörtur J. Guðmundsson, 1.5.2009 kl. 08:49]

Kannski eru þetta frægustu sléttuböndin, eignuð Látra-Björgu:

Táli, pretta, örgu ann,
aldrei dóma grundar.
Máli réttu hallar hann,
hvergi sóma stundar.

Stundar sóma, hvergi hann
hallar réttu máli.
Grundar dóma, aldrei ann,
örgu, pretta, táli.

:)

[Emil Örn Kristjánsson, 1.5.2009 kl. 08:53]

Jú, ætli þetta sé ekki fyrsta sléttubandið sem maður lærði á sínum tíma. Ekki verra að vera í hópi með Látra-Björgu þegar tekið verður saman sléttubandaskáldtal einhvern tíma

[Sæmundur Bjarnason, 1.5.2009 kl. 09:49]

Orðaröð í íslensku er svo frjáls að yfirleitt þarf ekki annað til að venjuleg ferskeytla verði að sléttuböndum en að gæta þess að upphafsorðin í fyrstu og þriðju ljóðlínu rími og stuðlarnir í sömu línum séu í tveimur öftustu kveðunum. Að yrkja sléttubönd með góðri meiningu er samt ekkert auðvelt.

Afhendingarháttur er talinn dýrari en sléttubönd. Þá er fyrsti stafur hvers orðs tekinn í burtu og við það myndast seinni hlutinn. Eftirfarandi vísa eftir Jóhannes úr Kötlum er gott dæmi:

Drósir ganga, dreyrinn niðar,
drjúpa skúrir.

[Emil Örn Kristjánsson, 1.5.2009 kl. 10:38]

Gat nú verið að Sæmi karlinn reyndi að gera lítið úr tilraun minni. Reyndar heitir háttur sá, sem þú vitnar til, Sæmi, afdráttur eða afdráttarháttur og er að sönnu dýr. Svo dýr að fáir hafa megnað að gera vitlega vísu úr honum.

Afhending eða afhendingarháttur er hins vegar mun einfaldari. Sigurður Breiðfjörð kvað svo um afhendingu og að sjálfsögðu undir þeim sama hætti:

Afhendingin er mér kærst af öllum bögum

þegar yrki óð af sögum.

Það er spurning hvort maður eyði nú frídeginum í berja saman einn afdrátt eða svo...

[Sæmundur Bjarnason, 1.5.2009 kl. 11:11]

Já, þetta er alveg rétt hjá þér, Emil.

Það er líka rétt hjá þér að það er mjög erfitt að fá almennilega meiningu í afdráttarháttinn þó það sé hægt að raða saman orðum.

Sveinn frá Elívogum orti:

Sléttum hróður teflum taflið,
teygjum þráðin(n) snúna.