Íslenzka er okkar mál

Já, þetta er nú bara sorglegt. Kannske við lærum að meta eigin tungu betur núna. Voru það ekki útrásarvíkingarnir sem sumir hverjir vildu bara taka upp ensku í sínum fyrirtækum... sumir hverjir sem voru vart mælandi á því tungumáli.

Annars veltir maður því fyrir sér, í ljósi þess hvernig sumar enskumælandi þjóðir hafa komið fram við okkur, hvort ekki væri réttast að taka ensku út sem skyldunámsgrein í grunnskólum og setja bara færeysku inn í staðinn.

Innan við fimmtungur velur íslensku

Athugasemdir

[Einar Steinsson, 2.12.2008 kl. 00:59]

Að skipta út enskunni er ágætis hugmynd... ef þú vilt að íslendingar fari aftur inn í moldarkofana. Það væri gagnlegra að leggja af þessa gagnslausu dönskukennslu og kenna frekar þýsku, frönsku eða spænsku, Íslendingar og Danir tala hvort sem er oftast saman á ensku. Íslendingar framtíðarinnar verða að vera að minsta kosti tvítyngdir.

[Aðalbjörg Tryggvadóttir (IP-tala skráð) 2.12.2008 kl. 14:22]

Mér líst vel á að skipta enskunni út fyrir færeysku. Færeyskan er jú mun hljómfegurra og skemmtilegra tungumál.

[Einar Steinsson, 2.12.2008 kl. 14:39]

Færeyingar eru gott fólk og færeyska skemmtilegt tungumál en ég endurtek þetta með moldarkofana!

[Emil Örn Kristjánsson, 2.12.2008 kl. 16:46]

Það er gaman að heyra að fólk deilir með mér hrifningunni á færeyskri tungu.

Einar minn, auðvitað er það kostur að geta talað sem flest tungumál. Sérstaklega þegar maður tilheyrir jafn fámennu tungumálasvæði og því íslenzka. Hins vegar efast ég um að þetta standist með moldarkofana og reyndar er fólk farið nota "moldarkofa-grýluna" nokkuð frjálslega. "Ef við gerum ekki svona þá förum við aftur í moldarkofana" og "hefðum ekki gert svona þá værum við enn þá í moldarkofunum" heyrist sí og æ.

Ég bendi á: 1. Enskumælandi þjóðir eru flestar latar að læra önnur tungumál og ekki eru moldarkofarnir að þvælast fyrir þeim.

2. Þjóðverjar eru ekki meðal þeirra sem státa mestri enskunnáttu, þó held ég að húnæðiseign þeirra sé með því sem gerist bezt.

3. Meðal Asíu-þjóða búa Indverjar sem búa yfri einni beztri enskukunnáttu. Húsnæðismenning þar mætti víða vera betri.

Sem svar við moldarkofaógninni er eftirfarandi röksemdafærsla, jafn gáfuleg: Japanir eta fitusnauðan mat og þjást síður af hjartasjúkdómum en Bretar og Bandaríkjamenn. Frakkar eta feitari mat en Bretar og Bandaríkjamenn en þjást samt síður en þeir af hjartasjúkdómum. Ítalir drekka rauðvín í miklu magni og þjást síður af hjartasjúkdómum en Bretar og Bandaríkjamenn. Rauðvínsneyzla Kínverja er hverfandi en þeir þjást líka síður af hjartasjúkdómum en Bretar og Bandaríkjamenn. Tíðni hjartasjúkdóma hefur því ekkert með mataræði að gera... það er enskan sem drepur.

Í fúlustu alvöru, eins og ég sagði áðan, það kostur að geta talað sem flest tungumál, þ.m.t. ensku. Því er það sorglegt hvað Íslendingar eru fljótir að fara í enskugírinn þó búið sé að eyða stórfé í að kenna þeim fleiri tungumál. Það er nefnilega óborganlegt að geta rætt við fólk á þeirra eigin máli en ekki alltaf að grípa til þriðja máls. Auk þess eru það margir sem bæði ofmeta eigin enskukunnáttu og ofmeta einnig gildi enskunnar. Hún er ekki alls staðar bezti tjámiðillinn.

Og ég endutek: Inn með færeyskuna!

[Einar Steinsson, 2.12.2008 kl. 22:40]

1. Enskumælandi þjóðir þurfa ekki endilega að læra önnur tungumál, þeir tala tungumál sem er alþjóðatungumál.

2. Næstum 100 miljón manns tala þýsku sem móðurmál og talið að aðrar 80 miljónir til viðbótar kunni þýsku, það er ansi stórt málsvæði og ekki endilega þörf á að læra annað tungumál en yngri kynslóðirnar tala samt yfirleitt einhverja og oft ágæta ensku.

3. Indverjar eru allt of margir í of litlu landi, það er þeirra vandamál ekki málakunnáttan.

Notkun á moldarkofahugtakinu er síðan að sjálfsögðu myndlíking. Ástæðan fyrir því að enska er komin til að vera sem alþjóðamál er það hve einföld hún er, það er sama hvað þjóðir eins og t.d. Frakkar eða Þjóðverjar reyna að ota sinum tungumálum þau eru einfaldlega miklu flóknari og erfiðari að læra heldur en enska og verða þess vegna undir hvernig sem þeir sprikla. Auðvitað er betra að nota önnur tungumál heldur en ensku víða ef menn kunna þau en það er glettilega víða sem hægt er að bjarga sér með henni jafnvel í grónum "enskuhaturs" löndum eins og Frakklandi og Þýskalandi, ég hef komið til nokkra Asíulanda og þar hefði lítið þýtt að reyna að nota önnur tungumál heldur en ensku úr því að maður kunni ekki þjóðtungurnar.

Færeysku frekar en dönsku! Það hefði allavega verið mér álíka gagnlegt í gegnum tíðina, þó þarf ég reglulega að hafa samskipti við Dani í vinnunni og það er ekki ég sem byrja á að tala ensku í þeim samskiptum.