Að slátra gullgæsinni...

Þetta er alveg einkennileg nálgun hjá yfirvöldum. En ferðaþjónustan er heldur ekki alveg saklaus. Fyrst fengu allir dollaraglampa í augun vegna þess að það átti að vera von á svo mörgum ferðamönnum því krónan væri svo hagstæð. Síðan hækkuðu menn verðin upp úr öllu valdi til að fá sem mest út úr hverjum sem hingað kæmi og þar á eftir fóru menn að reikna alla verðlista í erlendum gjaldeyri svo farþeginn er í bezta falli að greiða það sama og hann gerði fyrir kreppu. Ef ekki meira... og svo kemur í ljós að það er kreppa um allan hinn vestræna heim og ferðamennirnir hugsa sig tvisvar um áður en þeir leggja í dýrt ferðalag, hvað þá fokdýrt.

Þetta bitnar síðan á landanum, sem ekki sér sér fært að fara erlendis í fríinu, en ætlar að eyða orlofspeningunum sínum heima í staðinn. Hann hefur ekkert frekar efni á að ferðast um á Íslandi því ef honum er ekki réttur verðlisti í erlendri mynt, aðallega evrum,  þá er erlendi verðlistinn lagður til grundvallar og síðan umreiknað í krónur samkvæmt gengi og gisti- og afþreyingarverðið er komið upp úr öllu valdi.

Og nú eru yfirvöld s.s. komin með glampann og ætla sér stóra sneið af kökunni. Því miður þá er bara búið að slátra gullgæsinni áður en hún byrjaði að verpa.

Ég tek fram að þessi "fabúlering" mín á alls ekki við alla ferðaþjónustuaðila, en fjölmarga samt. Einkennilegt að vilja byggja verðlista sína á erlendri mynt þegar mest af rekstarkostnaði ferðaþjónustufyrirtækja er greiddur í íslenzkum krónum.

Ferðaþjónustan er vissulega sóknarfæri í gjaldeyrisöflun og atvinnusköpun. Þar þarf bara, eins og allstaðar, að beita heilbrigðri skynsemi í stað þess að missa sig í óraunhæfum væntingum.

Samtök ferðaþjónustunnar gagnrýna skattahækkanir

Athugasemdir

[Þráinn Jökull Elísson, 12.11.2009 kl. 17:56]

Góður pistill og raunsær. Raunsæi er því miður nokkuð sem margir innan ferðaþjónustunnar þekkja ekki. Kveðja.

[Jón Logi (IP-tala skráð) 13.11.2009 kl. 10:45]

Sjálfur er ég ferðaþjónustuaðili, bæði með gistiheimili og starfa á tjaldsvæði. Skal ég því lýsa því hvernig það kemur við mig.

Í samningum við ferðaskrifstofur sem bóka hjá okkur gefum við upp brúttóverð að hausti. Sama gildir um heimasíðu okkar. Verðin eru negld föst með VSK í September, og hygg ég að það sé svo víðast. Og þau eru í krónum. (Enda er VSK bara VSK, skiptir ekki máli á hvaða gengi prósentan er sett)

Hækkun á VSK EFTIR verðákvörðun er bein skattlagning á þá sem standa í þessu. Í þessu tilfelli, - mig. Ekkert annað.  Örlitlu fyrr hefði verið hægt að bregðast við þessu, en ekki lengur.

Sjálfsagt hefur þessu verið beint að kaupanda þjónustunnar, þ.e.a.s. "túristanum" sem er að njóta lífsins í nýju "ódýru" landi. En þetta kemur beint í hausinn á greininni í staðinn, og svo vill það gleymast að "túristinn" splæsir meir en áður vegna gengisins, - matur, bensín ofl, - og það er allt fullskattað.

Niðurstaða: Fábjánaskapur. Vanhugsuð skattbreyting sem líkast til skilar engum auknum tekjum og veldur skaða á greininni.

[Emil Örn Kristjánsson, 13.11.2009 kl. 15:06]

Þakka þér fyrir, Þráinn

Jón Logi, ég vinn sjálfur við ferðaþjónustu og hef gert mest alla mína starfsævi. Auðvitað veit ég vel hvernig svona skattheimta er gersamlega út úr kú. Hún kemur í raun upp um fáfræði ráðamanna um þessa undirstöðuatvinnugrein. Að sjálfsögðu ætti að vera til ráðuneyti ferðaþjónustunnar, hvort sem það væri eitt og sér eða sem hluti af öðru ráðuneyti. T.d. mætti hugsa sér iðnaðar- og ferðaþjónusturáðuneyti í stað þess að inni á iðnaðarráðuneytinu sé einn starfsmaður sem á að sinna heilli atvinnugrein.

Væri til ráðuneyti ferðaþjónustunnar þá væri fagmennskan líklega meiri. Þá kæmu menn ekki fram með jafn fáránlegar tillögur og þessar og þá væri kannske ekki heldur hver höndin upp á móti annarri í atvinnugreininni. Þú veizt vel að það sem ég rita hér að ofan er ekkert bull.  Menn eru að reyna að kreist blóðið undan þeim fáu ferðamönnum sem voga sér hingað fyrir einhvern stundarhagnað. Það er betra að eiga gullgæsina og bíða þolinmóður eftir eggjunum en slátra henni í von um að finna annað egg innan í henni.

[þorir (IP-tala skráð) 14.11.2009 kl. 10:04]

Í flestum samningum (án þess að vera tekið fram) gildir það ákvæði að komi til lagabreytinga sem breyta forsendum samninga er heimilt að taka upp viðkomandi samning og breyta honum og eða segja upp eftir atvikum.

[Emil Örn Kristjánsson, 16.11.2009 kl. 10:27]

Að sjálfsögðu eru slík ákvæði til, Þórir. Veltu því samt fyrir þér hvernig þér yrði við ef ferðalag, sem þú værir löngu búinn að panta og greiða myndi allt í einu snarhækka og þér gert að greiða háan bakreikning. Ég held að þú yrðir ekkert voðalega hress og líklega myndir þú ekki mæla með þessum áfangastað.