Endurtekið efni

Þar sem þessi heimasíða mín hefur orðið mun tíðlesnari á síðustu dögum leyfi ég mér að endurbirta 2ja vikna gamla grein til að hnykkja enn frekar á málefninu, enda mikið hjartans mál:

Alveg er það með ólíkindum hvað mörgum löndum mínum þykir að öll útlenzka hljóti að vera enska... og það ekki einu sinni alltaf góð enska.Nú hafa ýmsir viljað íslenzka orðið “at” þegar það er ritað @. Hafa þá flestir orðið til þess að taka upp forsetninguna hjá.

Það er alveg einstakur skortur á ímyndunarafli að geta ekki fundið neitt betra. Enska forsetningin “at” þýðir vissulega hjá en táknið @ stendur upphaflega fyrir “á” í viðskiptum, eins og í setningunni: “Fimm stykki á 70 krónur hvert”, sem væri þá rituð “5 stk. @ 70 kr.”Það er því í bezta falli leiðinda þýðingarvilla að taka upp orðið hjá. Hitt er verra, sem kemur upp um lélega málvitund, er að “hjá” er forsetning sem stýrir falli (rétt eins og allar forsetningar) og því gersamlega ónothæf í þetta hlutverk. Ímyndum okkur að maður héti Jón og ynni hjá Nýherja. Netfangið hans væri þá annað hvort “jon[hjá]nyherja.is”, sem myndi einfaldlega ekki komast til skila, eða “jon[hjá]nyherji.is", sem er bara rangt mál.

Það eru aðeins tvennskonar orð sem kæmu til greina í stað hinshvimleiða “at”. Annað hvort væri það áhrifslaus sögn eða nafnorð.Sem dæmi um áhrifslausar sagnir í þessu hlutverki mætti nefna jon[er]nyherji.is, jon[heitir]nyherji.is eða jon[þykir]nyherji.is.

Ég held þó að slíkt færi kjánalega í munni og betur færi að finna gott nafn á @-táknið. Ýmsar aðrar þjóðir hafa nefnilega borið gæfu til þess að finna skondin nöfn á þetta tákn, sem hafa svo orðið töm. Ég nefni sem dæmi að Danir og Svíar tala um “snabel-a” (rana-a), Færeyingar um “kurl-a” á ungversku heitir það “maðkur”, hjá þýzkumælandi Svisslendingum “apaskott” og svo mætti lengi telja.

Ég legg til að annað hvort verði tekið upp orðið “snúður” eða “skott-a” fyrir @-táknið. Sjálfur hallast ég að orðinu “skott-a” en ætla að leyfa áhugasömum lesendum að tjá sig um hvort þeim þykir léttara í notkun. S.s. jon[snúður]nyherji.is eða jon[skotta]nyherji.is.

Athugasemdir

[Karlotta (IP-tala skráð) 8.7.2008 kl. 11:37]

Krakkarnir mínir kalla þetta "hring-a" og stundum "kringum-a"

Held samt að það séu fáar hugmyndir sérlega góðar við að íslenska "at" þar sem flestum er það tamt. og í íslensku er það frekar merki en ekki orð eins og í ensku. Sjálf nota ég orðið at-merki eða hring-a.

Ef þú vilt reyna að breyta því í orð yrði það að vera, að, hjá, við eða á til að halda merkingu sinni frá upprunatungunni. Mæli samt með því að gera bara eins og danir og skýra merkið einhverju lýsandi orði fyrir táknið sjálft sem hafi hvorki aðra eða fleiri þýðingar en bara heiti á þessu tiltekna merki.

[Emil Örn Kristjánsson, 8.7.2008 kl. 13:45]

Nákvæmlega, Karlotta. Finna eitthvað orð sem er ekki þýðing heldur gott nafn á fyrirbrigðið. Hring-a væri svo sem ekki verra en margt annað.

[Sonja (IP-tala skráð) 11.7.2008 kl. 16:54]

Mér finnst 'hjá' gott orð fyrir @ af því að þú ert hjá einhverri ákveðni netþjónustu. Þú ert hjá simnet.is eða hjá talnet.is eða hjá gmail.com eða hverri þeirri netþjónustu sem þú kýst að vera hjá.

[Emil Örn Kristjánsson, 11.7.2008 kl. 17:08]

Sonja, þú skilur ekki alveg hvað ég er að meina.

Hjá er forsetning og sem slík stýrir hún falli í íslenzku. Það er ambaga að segja "hjá simnet" eða "hjá talnet". Rétt máltilfinning býður manni að segja "hjá símneti" og "hjá talneti" og þar með kemst pósturinn ekki til skila.

Auk þess eru það hvimleið áhrif úr ensku að nota persónufornafnið þú í óeiginlegri merkingu. Betra væri að segja: Maður er hjá simnet.is eða hjá talnet.is eða hjá gmail.com eða hverri þeirri netþjónustu sem maður kýs að vera hjá.