Finnst ykkur þetta hægt?

Ég eyddi helginni ásamt hluta fjölskyldunnar í sumarbústað í Skorradal. Lítið annað var gert en að slappa af og dunda sér við át og hvíld.

Þegar að brottfarardegi kom var aldursforsetinn (ég sjálfur) sendur út með það rusl og sorp, sem safnast hafði upp þessa daga, í ruslagám skammt frá. Ruslagámar þessir er með nokkru millibili þarna inn eftir dalnum og mikil þarfaþing. Þeir eru merktir og kemur fram á merkingu að þeir séu fyrir heimilissorp og að ekki sé ætlast til að þar sé hent ýmsu öðru s.s. málmum, gleri o.fl.

Mér brá því svolítið þegar ég opnaði gáminn og kom þar auga á heilt gasgrill, greinilega komið til ára sinna, sem þarna tók líklega um fimmtung rýmisins þrátt fyrir að tekið væri fram að ekki ætti að farga svona hlutum þar. Ég spyr: Finnst ykkur þetta ekki vítaverð misnotkun á þjónustu?

Athugasemdir

[Marta (IP-tala skráð) 16.9.2008 kl. 08:55]

Eitt sinn frétti ég af því að heilli kú hefði verið komið í gám í sveit einni. Ekki þarft að taka fram að kúin var ekki lengur lifandi og gasmyndun átti sér stað þegar á leið. Ekki var víst mikill gleðisvipur á þeim sem tæmdu gáminn og pressuðu ruslið.

Merkilegt hvað fólki dettur í hug að setja í þessa gáma sem eru annars hið mesta þarfaþing.